ភ្នំពេញ៖ រដ្ឋសភានៃព្រះរាជាណាចក្រកម្ពុជាប្រកាសជូនដំណឹងដល់ក្រុមហ៊ុនសាងសង់ដែលមានបំណងចង់ដេញថ្លៃគម្រោងសាងសង់អគាររដ្ឋបាលថ្មីនៃរដ្ឋសភាឲ្យដាក់សំណើដេញថ្លៃចាប់ពីថ្ងៃនេះរហូតដល់ថ្ងៃទី២៧ ខែវិច្ឆិកា ឆ្នាំ២០២១ វេលាម៉ោង៩ព្រឹក។
គម្រោងសាងសង់អគាររដ្ឋបាលថ្មីនេះស្ថិតនៅក្រោមជំនួយពីសាធារណរដ្ឋសង្គមនិយមវៀតណាមដែលមានតម្លៃ ២៥លានដុល្លារអាមេរិក។
ក្នុងដំណើរទស្សនកិច្ចរបស់អគ្គលេខាធិការបក្សកុម្មុយនីស្តវៀតណាមលោក ង្វៀន ភូជុង មកកម្ពុជាកាលពីថ្ងៃទី២០ ខែកក្កដា ឆ្នាំ២០១៧។ វៀតណាមបានចុះអនុស្សារណៈផ្ដល់ជំនួយជាទឹកប្រាក់ចំនួន ២៥លានដុល្លារដល់សភាកម្ពុជាក្នុងការសាងសង់អគាររដ្ឋបាលថ្មី ដោយថាដើម្បីជួយ និងពង្រឹងចំណងទំនាក់ទំនងប្រទេសទាំងពីរឱ្យរឹងមាំបន្ថែមទៀត៕